Gen 6 | TVK | STEP |

Genesis 6

Tumulen Usil Noah

Senesis 6:5-22; 7:1-5, 16-17, 23; 8:15-22; 9:1-15

5 Melele xa moletin xil mei latehe holu e ut etan, Iahova tepusi xa sexien xil nae tesa pupu pe meten. Nenemien nae tepolu ni tesaen vehakut. 6 Misak ni, Iahova ven tevuol ni xil ve sexien nae, e telong pangas xi ve moletin xil xa xi tepol ni. 7 Tesak ni, tehiteni mi xi tasen tehit, “Ngan xil xa natepol ni xil xiak, nisu lelen xil ra ut etan. Reitin, nisu lelen moletin xil itel vongoro xil e tuman xil vus, ngan xil xa mahulong e ngan xil xa tereli, vengan xa nalonge misa xa misa ve xil. Vahos mak mu vahit ninapol ni xil ti.” 8 E moletin tei takes, Iahova tehesi xi ven, hisen tehe Noah.

9 Ngan ak be tumulen usil Noah. E melele nan xil, xi tang be moletin xa meulien nan momal e sexien nan xil memese pe met Hi. Reitin, xi tang nggusil xat Hi. 10 Xi, horamue nan be tol: Sem, Ham e Sevet. 11 E moletin sav xil vus e ut etan, meulien e sexien nae tehe muis e pe met Hi. Xil lasak ni ut etan polu ni tutuen e vaeen xil. 12 Hi miketeh bemei etan, e pusi xa ut etan be muis tova tang, vengan xa holesok xil vus xa lameul ladi en langgusil sexien tesa xil tang.

13 Misak ni, vatei, Hi biteni mi Noah bit, “Nanemi nabit nisu lelen holesok xil vus xa lameul, vengan xa lasak ni ut etan polu ni tutuen e vaeen xil. Reitin, nisu lelen ut etan itel holesok xil vus xa lameul ladi en. 14 Mak, ma upol ni tuturil tova xa mahulong. Upol ni ni liei xil xa bos, ti umu xoteh ut xil e nim, e uvil xati ni koltar ixo nim e ixo hale mun tengan oei nava ti nim. 15 Upol ni imak: mita te rin xa teviei ihe handred tei e hanutap lu e he xalu mun (150 m), mita te ien ihe hanutap tei e lim mun (25 m), e mita te rin xa be nesao ihe le tei bus (15 m). 16 Taep teni ihe hap mita (1/2 m) ileli vesis nen ihe nesao. E vangite, upol ni von kakaoen ihe tol: tei ite nesao, tei ite hilaep, e tei ite etan. E rin tei, upol ni puiteh tei takes. 17 Upol ni imak vengan xa inou nisa oei imei xa ihe eilep e mei ipol xol ut xil vus. E ileh, isu lelen holesok xil xa lameul ladi e ut etan. Reitin, xil vus lilel. 18 E xouk, inou nipol ni hitxatien te xeih tei itelak xa nisikoe xolok itel ngenom xil. Xamitel kestang mutihe tuturil xa ihe mahulong xiak: xouk, atou nam, e horamue nam xatel itel atou natel xil mun.

19 E tuturil xa xiak, xouk uleh vongoro e tuman xil vus xa lameul mei lihe lulu, tei xa ihe malohos e tei xa ihe atou. 20 E holesok xil vus xa lameul e ut etan, upol ni imak vari: lu e tuman xil vus, e lu e vongoro savsav xil xa lamah e ngan xil mun xa labe vuran. Isak ni tengan xa xil kestang limeul itel xamitel. 21 Ti, uleh anien savsav xil vus xa ihe ae e amitel mun, e userep kuhi iti e vangit tuturil.” 22 Ma Noah pol vuol ni holesok xil vus xa Hi tesemae ni mini tengan ipol ni.